कुरो अर्कै हुन्थ्यो !

असिना र पानी,
कहिले अङालो मार्दै
कहिले लात्ती हान्दै
कावा खाँदै हावामा
थकाई मार्न आईपुग्छन
कलिलो प्याउलिको कुमनेर !
अहँ ,
लाजले होइन यसपटक
कठयाङ्रिएर खुम्चिन्छे लज्जावती;
निथ्रुक्क भिजेका जोडी ढुकुर
गुँडमा कुरेका बचरा सम्झदै
प्रेमालापको भाव
के देख्लान खै ....
बर्खा हुँदो हो त
कुरो अर्कै हुन्थ्यो !
म डिलमा बसेर सम्झन्छु
फुसफुसे हिउँको तन्ना ओढी
तिमी हुँदी हौ त
कुरो अर्कै हुन्थ्यो ....
त्यही मात्र एक दिन थियो शायद
माघे झरिमा रुझ्दा
जाडो नलागेको  !
अहिले ,
यो एक्लोपनमा
चुर्लुम्म डुबाइदिन्छन मलाई
थोपा थोपा शीतले पनि !







सपनाहरु

ब्युँझाइदिन्छन कहिले 
मेरा सपनाभित्रका सपनाहरुले !
ति रातहरु त 
उहिले थिए ,
ति साथहरु पनि
उहिलेनै थिए, 
अब नझस्काए हुन्न बेला बेलामा 
अब नतर्साए हुन्न बेला बेलामा ?
निदाउन त सजिलो छ मलाई ,
गाह्रो त ...
त्यसपछी पो हुन्छ 
जब सुरु हुन्छन 
सपना भित्रका सपनाहरु !