म गर्व गर्छु

म कति गर्व गरौँ 
मेरो देशको !
जहाँ गाउँका ट्रयाक्टर बलिया  
Cartoon: Uttam Nepal
उड्ने हवाईजहाज भन्दा ,
जहाँ नेताको संख्या धेरै 
'खाँटी जनता' भन्दा,
तैपनि म गर्व गर्छु साथी 
किनकि यी सबै मेरै देशमा छन् :
१५ रुपैयाको चाउचाउले
१५ लाखको घर दिने !
जुत्ता टल्काउन पालिस होइन 
'टर्च' उपहार दिने !
जनता-नेता ...
रहेनन कोही अब, 
फलामे छड 'इमान्दार' हुने |
कति राम्रो चलन, आहा !
देश बनाउने ठेक्का 
नीति निर्माताले होइन,
'सिमेन्ट कम्पनी'ले लिने !
चोर-ठगलाई जेल हाल्ने ?
धत् , त्यो उहिलेको कुरा...
मेरो देशमा नेता/पत्रकारलाई 
राख्ने अब जेल खुल्ने  !
उपभोक्ताले खाईदिन मात्रै पर्छ 
पाईखानामै सुन्दर 'मिठाई' बन्ने !
तैपनि म गर्व गर्छु ;
जे पनि बिक्ने मेरो देश !
मान्छेका सम्बेदना
नेताका नैतिकता 
बुद्धिजीविका बिचार
आफन्तका आत्मियता 
सबलाई प्रायोजन गर्न मिल्ने !
तैपनि म गर्व गर्छु साथी 
किनकि यी सबै मेरै देशमा छन्  
दुनियाँमा अन्त 
कहिँ नहुने कुराहरु ||