कृष्ण पक्ष

मेरो त संसार सानो छ,
भन्नेले भनुन
हत्केलाले सुर्य छेकिन्न भनेर ;
आऊ हेर
मेरा जोर आँखा ,
मैले हेर्ने प्रत्येक मुहारमा
तिम्रै 'लेबल' टाँसिएका छन्
म देख्दिन अरु कोहि
मलाई छुँदैन अरु केसैले |
म चाहन्छु ,
म नसुनुँ यो कोलाहल
नदेखुँ यो झमेला
भैगो, नभोगुँ त्यो परावर्तित उज्यालो
शुक्ल- पक्षमा के छ ?
त्यो अर्कैको उज्यालो
त्यो अर्कैको छबि
फगत एक ऐना ;
मलाई अध्याँरोमै महसुस हुन्छ
तिम्रो पूर्ण सुन्दरता |
आऊ हेर
मेरा जोर आँखा,
मेरो त संसार सानो छ !