औसत : अर्थात म !




एउटा औसत जुँगाको रेखी,
मध्यम सपना,
केहि अफ्ठ्यारा सम्बन्धहरुको कथा,
च्यातिन नसकेको 'कन्भर्स',
ऐजन ऐजन .....
यि बाहेक मसंग 
'तिलस्मी' केहि छैन |
धेरै आश नबोकि आए, 
एउटा हाँसो 
आधा कप्टेरो बाँडौला |
आँखाको डिलमा हेर 
पढ्न सक्छौ भने :
बिछट्ट खुशीको 'छोटो बाटो'
अनि 
उग्र सपनाको महत्वकांक्षी सिंढी 
यहाँ उपलब्ध छैन !  


दुख्ने चिजहरु

कहिलेकाहिँ लाग्छ
कागजकै बनाउँ दुनियाँ
कागजकै बसाऊँ घर
गुजुमुज्ज पारी कागजकै डल्लो
पोतेर रातो 'वाटर-कलर'
बनाउँ एउटा धड्किने मुटु,
टाँसेर खोटो टुक्राटुक्री 
जोडौं सम्बन्धको जालो |
कहिले काहिँ लाग्छ 
कागजकै बनाउँ आँशु 
अनि पोतौं कालो रंग 
स्कुले 'साईनपेन' ले |
तर समस्या सबै यसमै छ; 
ति सब दुख्ने चिज जति 
सजिब छन् !
अहिले हेरें ;
सानोमा बनाएको
त्यो सानो मुटु
खोबिल्टे आँखा,
च्वास्स दुख्ने, छिनमै रसाउने  
अहिले जस्तो 'धराप' थिएनन !